Ussan n taddart deg tallit n Web
Da Ḥemmu, ṭamen n udrum n Iḥiducen, ɣas akken zrin fell-as 65 n iseggasen, yettban am ilemẓi. Yeṛwa aman n temẓin. Ilul deg 20 yebrir 1952 ihi dɣa yettzuxxu s wazemz-is (date) n tlalit-is. Yeqqaṛ-asen i yilmeẓyen n taddart-is, nek d Amaziɣ s wudem amezwer (par défaut). Ɣas akken ugar n uzgen n tudert-is yewwet-itt deg Fṛansa, tutlayt Taqbaylit ur tt-yettu ara. Mačči am wid irezzun ar tmura n umalu tagara-agi. Akken yeqqaṛ Atmani, wa yuɣal d aɛrab, wayeḍ d aṛumi.
Da Ḥemmu, iḥemmel ad d-yeffeɣ ar tejmaɛit yal tameddit. Ibiri deg idis, tafelwit n uselkem (tablette) gar ifassen-is. Deqs i yeɣilen d aselkim aziraz (ordinateur mobile: laptop) ameẓyan. Da ḥemmu yezga yeqqaṛ-asen, ala, tagi qaṛṛen-as tafelwit n uselkem. Tetteddu s yiwen n unagraw n wammud (système d’exploitatoin) isem-is Android. Llant tfelwiyin-nniḍen n Apple qqaren-asent iPAD, acu kan teddunt s unagraw iOS. Da Ḥemmu yezga yessefham deg-sen, acu kan ahbuh. Gullen ur gzan.
Ḥatan ihi, yerna-d Da Lwennas ɣur-s. Da Lwennas, ɣas akken ur yeɣri ara, acu kan igezzu timsal imir imir. Ur tettunefk ara tegnitt ad yeddu ar uɣerbaz am netta am wiyaḍ. Imi yekker-d d agujil deg tallit-nni n tegrawla mgal Fṛansa.
Da Lwennas isel i yilmeẓyen ticki ttmeslayen ɣef ayen icudden ar Internet. Yeẓra d akken d aẓetta i yesdukklen ibenkan (périphériques) n umaḍal meṛṛa. Yeẓra d akken mačči ala iselkimen kan, ula d iṛubuten n yeẓmi (Jus) neɣ timacinin n txeggaṭ zemrent ad qqnent ar uẓeṭṭa-agi agraɣlan. Acu kan, meskin, ur yessin ara ad yaru dɣa yeḥruri aṭas. Tikwal yesḥissif deg iman-is.
Da Lwennas iḥemmel Da Ḥemmu. Cerken tabaḍnit, myekcamen aṭas. Da Ḥemmu seg tama-s, imi yeẓra tamsalt, yal tikelt ara yemlil yid-s, ad s-yesken kra n texbula (astuces) n tuqqna (connexion) ar Internet s useqdec n tfelwit n uselkim din-a deg tejmaɛit. Yemmel-ayas amek ttbeddilen iɣewwaṛen (paramètres) n tutlayt deg kra n yesnasen (applications) akked ifecka (outils). Yemmal-ayas amek ara yessel i yifuyla imeslawen (fichier audio) srid seg usmel Web (site web) war ma yessider-d (télécharger) isefka (donnée) ar tfelwit-is s wudem adigan (localement). Yemmel-ayas amek ara yernu amiḍan i tira n yeznan deg Gmail.
Imi lɛid tetteddu-d, da Lwennas yenna-yas. Acu tenniḍ limer ad nheggi si tura tabdart (liste) n yemdanen ara yawin tunt deg timecreṭ-agi d-iteddun?
Da Ḥemmu yegdeh. Ihi isenker asnas Excel akken ad bdun ad arun ismawen n ixammen n taddart. Yuzen iznan s yimayl i wid iseqdacen allalen atraren. Ma d wiyaḍ ad ten-iwali ticki.
Ar tagara yenṭeq Da LWennas yenna-yas. A Ḥemmu, azekka ad nali ar Uqbu ad tedduḍ yidi, ula d nek ad d-aɣeɣ yiwet n tfelwit n uselkem, imi aseqdec-is mačči d ayen ẓẓayen. Rnu ɣur-s, ad izmireɣ ad inigeɣ sanida bɣiɣ, melmi bɣiɣ.
Akken i yella lḥa. Ddan yemdukal s Aqbu. Uɣen-d tafelwit n uselkem. Yal ass, da Lwennas yettissin ugar. Ilmed ula d tira n tutlayt Taqbaylit. Ass-a yessaweḍ ad isefrek (gérer) ablug (blog) yettmeslayen ɣef yensayen (traditions) n taddart-is s Teqbaylit. Yessaweḍ ad yemlil ula d yemdukal-is iqbuṛen yellan agmaḍ akin deg Tizi Wezzu akked Tubirett.
Yal tameddit, Da Ḥemmu akked Da Lwennas, ad d-ffɣen ar tejmaɛit s tfelwiyin n uselkem gar ifasen, ad qqimen ad ttarun deg iblugen-nsen ɣef temsal icudden ar Teqbaylit tatrart deg ifecka imaynuten.
Taqbaylit n uzekka
Muhend Belqasem
