Amek ara tidireḍ di tmurt anda teẓɛen wid yemḥemmalen? Amek ara tcerkeḍ akal, amezruy, tasekla, tutlayt ula d tajmaɛt d wid yettwalin lɛar di tayri? Ayen INSELMEN anda ibɣun ilin ttagaden tayri? Tthabin tayri, tekksen-tt seg wulawen n wid yettnadin fell-as, imi ur ssinen ara azal-is, imi ugaden ad ten-id-tefḍeḥ belli ur tqebbel ad tezdeɣ ulawen-nni ideɣlen.
Ma yella ɣer yeqbayliyen, ur as-qqaren ara d leḥram, qqaren-as lɛib. D acu i d lɛib? Ayen nugi tayri? D acu-tt tayri? Aqbayli ma yella iwala sin msudanen yiɣil ad tsax taddart-is, ad hudden yexxamen, taddart ad tuɣal d lbuṛdil, ad huddent tlisa, ad yeffeg lqanun, amdan ad yuɣal d lwaḥc ad yeglu ula s lmal…
S ttawil kan, s leɛqel, iwacu tettargigiḍ? Ur tnegger ddunit, ur ttɣaren isaffen, ur treggel ṣṣaba… d tasudent, d ayen yelhan, ur tneqq, ur txebbec, ur tnegger taddart. Lɛib ma yella yella deg win yugin tayri, lɛar ma yella, ad t-naf deg win yugin tudert, yessawal kan i lmut. D acu i as-d-tessukkseḍ i weqcic ma yella yefka-yas tajeǧǧigt i teqcict? tcukkeḍ ad terwel tefsut?! Ayen nugi ad nefreḥ? Ayen nɣunza taḍṣa? Imɣaren-nneɣ werǧin kxekxen d taḍṣa! Ttaḍṣan cwiṭ, ur ccmumuḥen ara aṭas, gan talast ula i taḍṣa. Ayen ur ttaḍṣan ara yemɣaren-nneɣ, ttagaden ad d-yer ṣṣut wedrar? Neɣ d “ccahwat n ddunit” akka i awen-nnan yenselmen?! Tamurt-iw teḥmel tesheli leḥzen akken tewɛer i teḍṣa.
Tamurt-iw ur tebɣi tayri akken tebɣa lkerh; kreh win tebɣiḍ, ɣur-k kan ad tḥemmleḍ yiwen! Di tmurt-iw ugin tayri a talsa. Tamurt-iw ur teẓri ara belli ass ideg ara teḥlu, d tayri ara s-d-yawin ddwa. Ass ideg ara tuɣal tfekka n tmeṭṭut d ayla n tmeṭṭut ad as-texdem akken i as-yahwa, ass-nni ad yebdu ḥellu-m a Tamurt-iw. Asuden, aslaf, uqqu d tudert, ma yella tugiḍ-ten a tamurt-iw d tafat ay tugiḍ, deg uɛebbuḍ n ṭlam ara tkecmeḍ.
Anef a Tamurt-iw i yelmeẓyen ad mḥemmalen, ad msudanen, ad myiṭṭafen afus, ad myefken ijeǧǧigen, ad ḍṣen wagar-asen, ad ddukklen, ad myizmaḍen, ad mḥewwin, ad gnen akken, ad argun akken, ad run akken, ad d-kkren akken, ad ḥewsen akken; taddart ad teqqim d taddart yelhan, abrid ad yizdig, ssalimat ad ččarent, ad neɣsen imenɣan, ad ḥlun yemdanen, ad teǧǧuǧǧeg tudert. Ur ttɛanadet ara inselmen at ddɣel d lkerh, ur ssinen ara tiẓeṭ n tudert ɣef waya i ken-zzuɣuren ɣer lmut.
Irnaten Murad
