Nesseḥfa-k ay abrid s tikli, ay iwsi neggumma ad ak-naweḍ. Nteffeɣ-d ɣer iberdan yiwet n tikkelt deg useggas, bḥal iberriqen. Nettɛeggiḍ, ncennu, nesderdur deg iḍarren, nekkat deg ifassen, nettcebbiḥ kan i wallen; walit-aɣ-d a medden amek nugi lbaṭel d wamek nebɣa tilelli.
Nesseɛreq i webrid ixef-is, akken i as-nesseɛreq i umennuɣ iswi-s; nebɣa tadukli maɛna nesnaɣay atmaten.
Nebɣa tilelli maɛna nteddu d yinselmen. Neckentiḍ deg izamulen ssbeḥ, tameddit nɣelli-d am yemḍuren. Neǧǧa taddart neḍmeɛ imeẓẓaɣ n temdint ad aɣ-d-slen.
Ayen neggumma ad nsers aḍad n tidet ɣef lǧerḥ? Ayen neǧǧa Tutlayt nettnaɣ ɣef Lluɣa? Ayen neǧǧa Idles nettnaɣ ɣef Taqafa?
Yebrir ur yezmir ara ad yejbeṛ ayen deg-neɣ yeẓen. Nettak tarwa-nneɣ ɣer llakul ara ten-ikerfen, llakul n waɛraben-inselmen, neḍmaɛ tanekkra d tlelli. Di remḍan n berrek am ileɣman, nessusum am iselman mi aɣ-d-ḥettmen laẓ.
Di 20 yebrir nettɛeggiḍ “walit-d irgazen a leǧnas!”
Mačči d tagrawla i nxeddem, d irebbi i nberred i trewla. Mazal allaɣ n weqbayli yettwazuzen s tura el maǧida. Imeḥbas di lḥebs rekkun, nekkni nzemmeḍ arkasen i tikli. Idammen ḥemmun, ulawen d isemmaḍen.
20 yebrir medden akk d igrawliwen.
Nekkes sser i umennuɣ; akken nxeddem i tlawin i nxeddem i tsertit, akken nxeddem sdat tlawin, i nxeddem sdat tsertit “d zaɛma yakk!” .
Ass-a nugi ad as-nefk isem i weɛdaw. Nugad ad as-nsemmi. Neẓra belli ma yella nsemma-yas, ilaq ad t-neɛqel, ma yella neɛqel-it ilaq yid-s ad nennaɣ.
Yeɛya deg-neɣ webrid. Yya-w ad nbeddlet tikli, ad nbeddel tamuɣli, ad nebrut i “les slogans” ad nreffdet tikta, yes-sent ara nessečč tagrawla.
Tikli deg umennuɣ mačči s iḍarren, s wallaɣen. Iswi mačči d la wilaya, iswi d timunent.
Nekkat di lezzayer, nxeddem am izzayriyen.
Nebɣa tilelli, nedda d yenselmen.
Amek ara yali wass fell-aɣ akka ?!
Irnaten Murad
