Izlan n at Wagerakal mačči kan d ccnawi ara yezzuznen lexwaṭer n wid ara sen-yeslen. Izlan-agi d tawwurt neɣ d tiwwura i yellin ɣer umezruy, tasekla, idles akked uzekka n tmurt n yiqbayliyen.
Yal izli d tala yettfeggiḍen, aman-is swayen amezruy ifuden tilin-nneɣ, aman-is swayen amḍiq ideg nedder acḥal d leqrun, aman-is ttecruruden ttazallen ɣer yilel Agerakal, dinna ad aɣ-d-smektin wid ukud neccerk zik amḍiq, idles,wid yewwin abrid n tussna akked tmussni.
Yal izli, yesmektay-d timiṭ-nni i aɣ-yeɣlin deg Yilel Agerakal, Amḍiq n tɣerma Tagrikit-Talaṭinit ayen ala Taqbaylit? Yal izli, deg-neɣ yessaki-d amezruy neǧǧa igen, yessaki-d ayen akk nezgel asmi i aɣ-zzuɣren Wat Yiwen (les monothéistes) ɣer imeḍqan ur nessin, ur nezmir, ur aɣ-nlaq, almi ass-a yeɛreq-aɣ ula d abrid ɣer yiman-nneɣ.
S yezlan-agi yezmer ad naf abrid s yetran ɣer yiman-nneɣ, ɣer wakal-nneɣ s laɛnaya n Wenẓar akked Igennawen nniḍen. Irebban-nneɣ ad ten-ger i Tefrit akken ad tesseḥlu igran. I Wenẓar akken ad yesṭṭuqet aman. Wnisa ad teẓẓu deg ugdud tayri, ad d-yuɣal lferḥ ɣer wudmawen… S yes-sen ad nqabel lmut akken nniḍen, Yarmec yid-s ad yeddu ɣer wanda yakk ara naweḍ. Ubdir ɣur-s ad neddari, ur nettagad ad nettwaḥqer.
Izlan-agi d abrid ɣer ugama, agama-nni iseg d-nekka; igenni-nneɣ dayen ad iɛemmer, ad iɛemmer s wayla-nneɣ mačči s wayla n wiyaḍ.
Ccnawi-yagi d tiɣri i Wenẓar akken ad d-yuɣal ɣer tarwa-s, ɣer wakal-nni kerzen wid ur nessin, wid ur nemɛin.
Ma yella Aqbayli yebɣa ad yili, ad yettuqadar d lǧens am netta am leǧnas nniḍen s waya kan ara yili. S waya ka ara d-iɛawed talalit.
Tamawt: Llan 2 iḍebsiyen, deg-sen 27 n yizlan (ccnawi) ccnan-ten 27 icennayen. Isefra yura-ten Umeẓyan Keẓẓar.
IrnatenMurad
