Acḥal aya i bγiγ ad aruγ kra γef Ahmed Nekkar, acku yella ger wid yettaken deg wakud-is i tsekla n yigerdan (littérature pour enfants)
Atan ihi tusa-d tegnit imi id yessufeγ ussan-a yiwet n tmacahut « TISLIT N UDFEL » i tzemrem ad t-teγrem i warraw-nwen imecṭaḥ. Tamacahut-a teffeγ-d ɣer tezrigt TAMAGIT i yeselḥay netta s timad-is.
ḤMED NEKKAR d yiwen ger imaruyen atraren imezwura n tsekla taqbaylit, acku yura ungal-is amezwaru deg 1999. Win iwumi isemma: YUGAR ACERRIG TAFAWET (Tizrigin Yuba wis sin).
ḤMED NEKKAR, amedyaz, anagal, amaru, ilul ass n 13 meɣres 1955, deg Uԑfir n Delles (Bumerdas). Yebda tira n yisefra deg yiseggasen 1972-1973, asmi yella yeqqar deg tesnawit “ Ʃebdereḥman Illul” deg Larebԑa n At Yiraten.
Deg 2012 yesazreg-d ungal-is wis 2, iwumi isemma: GER ẒẒEBRA D YIFḌISEN (Tizrigin Le savoir). Aseggas id yezzin (2013) ḤMED NEKKAR yura i yinelmaden n uɣerbaz alemmas d wid n tesnawit yiwen n udlis n tɣuri «ADLIS N TΓURI, almad d uselmed n teqbaylit s yiluɣma d yisnasen». Yeffeɣ-d ɣer tezrigt La pensée.
« TAJEǦǦIGT N MEΓRES » d ungal-is wis 3 id yesuffeɣ deg 2015 ɣer tezrigt Tamagit. Maca ungal-a d tasuqqilt n wungal “Rencontre inattendue” n umaru Moussa Bouchakour.
Ungal-is wis 4 iwumi yefka azwel “AẒEḌḌA N TISSIST”, yeffeɣ-d deg 2016 ɣer tezrigt Tamagit.
ḤMED NEKKAR yesufeγ-d ya kan Amawal n Tmaziγt, adlis « Apprendre Tamazight Maintenant », akked yiwet n tmezgunt, isem-is TIZIRI USIGNA.
Deg 2015 yessuqqel-d γer teqbaylit tullist « La Chèvre de Monsieur Seguin » i yellan deg wammud n tullisin « Lettres de mon moulin » n umaru afransi Alphonse Daudet (1840-1897). Tin umi isema: Taγaḍt n Mas Seguin (Tizrigt Tamagit). Daken id yesuqqel tullist «Isegbazen n tedyant» n tmarut tabritanit Stéphanie Benson.
Dima deg 2015 ɣer tezrigt Tamagit, yesuffeɣ-d yiwen n udlis, llan deg-s snat n tmucuha: “TAGELDUNT DEG UGLIM N UJḤIḤ” akked “AMETTAKER ASADARAN”.
« Alis di tmura n tirga » d tasuqqilt id yerra ɣer teqbaylit ḤMED NEKKAR seg tmacahut yettwasnen s uzwel « Alice au pays des merveilles » n umaru abritani Lewis Carroll (1832-1898).
Racid At Ali uQasi
