… Yiwen n wass ssawleɣ-d i tqeddact i d-yelhan d warraw-iw (Yulia Vasilevna) iwakken ad tt-xelseɣ.
Nniɣ-as : Qqim a (Yulia Vasilevna) … yya-n ad nemḥasab … Kemm s umata tetteḥwijeḍ idrimen, maca tettsetḥiḍ, ur ten-id-tessutureḍ ara s yiman-im … Ih… Nemsefham ad am-ttakeɣ 30 n yirublen deg wayyur. Tenna-d : 40.
… Nniɣ-d ala, 30 kan… Anect-a yura ɣur-i … Ttxelliseɣ yakan tiqeddacin am kemm s 30 n yirublen kan … Ihi txedmeḍ ɣur-neɣ sin n wayyuren.
Tenna-d : Ala, sin n wayyuren d 5 n wussan.Nniɣ-as : sin n wayyuren kan … atan yura ɣur-i … Ihi, tettalaseḍ 60 n yirublen … Ad asen-nekkes 9 n wussan n lḥedd … Ur tesɣireḍ ara (Colia) deg wussan n usgunfu, tetteffɣeḍ kan yid-s … Rnu 3 n wussan n leɛyud …
Inbeddal wudem n Yulia, teṭṭef deg yijifer n tqendurt-is, maca awal ur tt-id-yuli !
Nniɣ-as : ad nekkes 3 n wussan n leɛyud, ihi 12 n yirublen kan ara d-yeqqimen… (Colia) yella yuḍen 4 n wussan, kemm ur t-tesɣireḍ ara … Tesselmadeḍ i (Varia) kan … 3 n wussan, tuɣmas-im qerrḥent-kem, tessuref-am tmeṭṭut-iw ur tesselmadeḍ ara mi ara nečč imekli …
Ihi, 12 rnu-yas 7, 19 ad ttwikksen, ad d-qqimen kan 41 n yirublen … Yelha akka ?
Yulia Vasilevna, tuɣal d tazewwaɣt, ččuren-t-d wallen-is d imeṭṭi, yergagi uɣesmar-is… Maca, awal ur tt-id-yuli !
Nniɣ-as : send ad d-ilal useggas amaynut, terẓiḍ afeǧal d ṭṭbeq … ad nekkes 2 n yirublen …Afenǧal, yeswa ugar, acku n ttrik ; ad am-isemmeḥ kan Yillu ! Ad t-ɣermeɣ …, ur d-telhiḍ ara d Colia akken i ilaq, teǧǧiḍ-t yuli aseklu, icerreg-d lqecc-is … Ad nekkes ihi 10… Ur terriḍ ara daɣen lwelha-m akken i ilaq tuker tqeddact i (Varia) ssebbaḍ, ihi ilaq ad d-telhuḍ d kra yellan, acku tettwaxlaseḍ … Ihi ad nekkes daɣen 5 … Deg wass n 10 deg yennayer teddmeḍ 10 n yirublen.
Tenṭeq-d (Yulia Vasilevna) : Ur ddimeɣ ara !
Nniɣ-as : Maca, anect-a yura ɣur-i !
Tenna-d : Ihi, yezmer …
Nniɣ-as : Seg 41 ad nekkes 27 … ad d-ggrin 14…
Iẓri-s la yebda ineggi-d … Tidi tebda-tt-id seg tanzarin ticebḥanin …
Meskint, ur tuklal !
Tenṭeq-d s urgagi : Ddmeɣ kan yiwet n tikelt … 3 n yirublen kan daya …
Nniɣ-as : D tidet ! muqel, ur ten-uriɣ ara ! Ad nekkes seg 14 n yirublen 3, ad d-ggrin 11 … Hatna yidrimen-im ad tameɛzuzt !
Kraḍ … Kraḍ … Kraḍ … yiwen … yiwen … Ax !
Fkiɣ-as 11 n yirublen … teṭṭef-iten, tger-iten ɣer lǧid s urgagi… tenna-d s tuggdi : Tanemmirt …
Kkreɣ-d s zzɛaf, ttruḥuɣ ttuɣaleɣ deg tzeqqa-nni, akken ad kkseɣ lefqaɛat-iw ..
Nniɣ-as: Tanemmirt ɣef wacu ?
Tenna-d : ɣef yidrimen-a ..
Nniɣ-as : Ahya a cciṭan, maca atan neqsen ! Ukreɣ-kem ! Ayɣer ara d-tiniḍ tanemmirt ?
Tenna-d deg yimukan-nniḍen ur yi-ttxellisen ara akk !
Nniɣ-as : Ur am-d-ttaken ara ?! Anect-a nekk ur t-xeddmeɣ ara ! Bɣiɣ kan ad ḍseɣ yid-m, ad tegzud tamsirt akken i ilaq … Ad am-d-fkeɣ akk idrimen-im, 80 n yirublen akken ma llan !
Atnan heyyaɣ-ten-id i kemm ! Maca amek i tzemreḍ ad tsebreḍ akk i wanect-a ?
Ayɣer ur d-tenniḍ kra ? Ayɣer i tessusumeḍ ? Amek almi ur tezmireḍ ara ad d-tessufɣeḍ accaren-im deg ddunit am ta ? Amek i tzemreḍ ad tḥedqeḍ deg wanect-a ?
Teḍsa-d s leɛdez, ɣriɣ-d deg wudem-is : Izmer …
Ssutreɣ deg-s ssmaḥ ɣef temsirt-a, fkiɣ-as idrimen-is akken ma llan …
Tenna-d tanemmirt, teffeɣ … Qqimeɣ ttxemmimeɣ : A ziɣ d tidet, yeshel mliḥ ad trekḍeḍ igellilen deg umaḍal-a.
Akka i teḍra d waṭas imira.
Tasuqqilt sɣur : Malek Aloui
Seg tsekla tegreɣlant n umaru Arusi : Anton Pavlovitch Tchekhov (Антон Павлович Чехов).
