Amek ara nesbedd tasekla-nneɣ ma yella ur nessin acemma ɣef yimeskaren (auteurs) i as-yefkan udem ? Amek ara d-nsebgen tasekla-nneɣ ma yella ur nesɛi ara iḍrisen ara as-yefken udem ? Amezruy n tsekla-nneɣ d aquḍar ma yella neqqar-as kan : « tasekla-nneɣ d tamerkantit, nekni ur nettaru, ur neqqar ».
Asalu, mačči d nekni ara t-yerẓen ; yenǧer yakan ; issefk kan fell-aneɣ ad t-neḍfer, ad neddu d ubrid iberzen, abrid-nni issuffuɣen ɣer tegnit n umezruy d talsa. Ma mačči akka, anef i tessirt n wawal ad tẓeḍ, awren-is ad t-yeddem waḍu ad t-yeḍlu i tɣeltin n tatut. Cwiṭ cwiṭ, ad tekfu tqbaylit, ad nekfu s leqbayel. S yin akin ad as-neqqar : “je suis fier d’être kabyle”.
Nessen cwiṭ yusef U Qasi, Nessen cwiṭ Lɛerbi at Wejɛud. Nessen cwiṭ Musa Awagnun, Nessen cwiṭ Muḥend Said Amlikec. Nessen cwiṭ Smaɛil Azikiw… Akka : cwiṭ cwiṭ akk; ula d Xliǧa tukrift (lalla Xiliǧa ah) nessen sin isefra-ines. D axessar…
Anwa yessnen Ḥmed Lemseyyeḥ ? Isem-is, yella, isefra kra kan. Anwa yessnen Yusef Ulefqi? Isem-is yella, isefra amek akken. Anwa-t Muḥend Saɛid n teẓrut ? Isem iqqim-d, ma d isefra, wissen. i Messeɛd Ɛimi, acḥal i tt-yessnen ? Neɣ Taseɛdit Ḥafsi ?
Mačči kan d aya a Leqbayel. Ur nessin ula Muḥend U Yeḥya. Ih, a Leqbayel, win akken s wyaes nettzuxu, win akken i as-yennan… ulayɣer ad awen-d-iniɣ… ilaq teṛaam akk ayen i d-yenna d wayen i d-yura d wayen yurar.
Mačči kan d aya. Ur nessin Ben Muḥemmed, ur nessin Ɛmer Mezdad, ur nessin Ameẓẓyan Kezzar, ur nessin ǧamal Benɛuf, ur nessin Salem Zenya, tedduḍ akkin… ternuḍ wiyeḍ. Deg-nneɣ kan awal.
I zeɛma nessen Lewnis At Mengellat, neɣ Lwennas Matub, neɣ Lmulud Zeddek, neɣ widen akk i nettarra di tkerrust (yerna di les flash disque, ittusemma d apiraṭi i ten-npiraṭi) ?
Nessen cwiṭ Si Muḥend U Mḥend Bulifa d Mɛemmeri d Ɛedli d muḥend Aɛrab, nessen cwiṭ Lbacir Amellaḥ s Buɛmara d Tsadit Yasin d yiɛeggalen n tdukla tadelsant Lbacir Amellaḥ. Nessen cwiṭ Ccix Muḥend s Mɛemmeri… D aya… Nenwa nexdem axesssar.
Xuṣṣen-aɣ seɛṭac i ɛecrin…
I Saɛid Ucemmut ? yella win i t-yessnen ?
Tajmilt i Muḥemmed ǧellawi. Adlis-ines ɣef umedyaz-agi d adlis mgal tatut; d adlis ittarran azal i yidles n teqbaylit. Adlis-ines tga d tamigt tadelsant tameqqrant. Adlis am wagi d abrid yettawin ɣer umezruy n tsekla-nneɣ.
Adlis n Muḥemmed ǧellawi, ad t-nernu ɣer wid Mɛemmeri ɣef yimedyazen iqdimen n tmurt n Laqbayel, ɣef Si Muḥend, ɣef Ccix Muḥend; ad t-nernu ɣer wid n Mulud Ferɛun d Yunes Ɛedli d Zzin Muḥend Aɛrab ɣef Si Muḥend; ad nernu ɣer win n Kamal Buɛmara ɣef Lbacir Amellaḥ, ad t-nernu ɣer win n Nabila Idrisi ɣef Tseɛdit Hafsi; ad t-nernu ɣer win Yeḥya Bellil d ǧamal Rezqi ɣef Muḥend Saɛid Amlikec, atg. Idlisen-agi akk, yis-sen ara nebnu amezruy n tmedyazt taqbaylit… Amezruy n tsekla taqbaylit.
Adlis-agi, isemma-as Muḥemmed Ǧellawi : Saɛid Ucemmut. Amedyaz seg At Meddur (1899-1990); yeffeɣ-d aseggas-agi (2018) ɣer tezrigin El Amel (Tizi-Uzzu). Deg-s 94 d asefru; ttawi-d ɣef ubeddel i tbeddel teqbaylit, ɣef tegrawla n Lezzayer, ɣef tlufa i d-ibanen seg timunent ɣer da, ɣef temsal n yal ass yettidir uqbayli deg udrar, deg uzaɣar, deg temdint, yedder umedyaz netta d wiyeḍ, atg.
Adlis-agi, d akufi n yisalan ɣef umedyaz Saɛid Ucemmut. Tura atan nessen-it, nessen tamnaḍt ideg i d-yekker d wanda yedder, nessen tallit-nni-ines. Mačči kan d aya. Nessen ula wamek gan isefra n umedyaz-nni. Tajmilt i Mass Ǧellawi.
S udlis-agi, yuɣal Ṣaɛid Ucemmut d yiwet n tgejdit gar tigejda n umezruy n tmedyazt taqbaylit. Tajmilt i Mass Ǧellawi.
Ṣṣenf n udlis-agi, mačči d ayen isehlen ad t-yexdem yiwen. D ayen iḥwaǧen akud d trusi n leɛqel d tezmert. Ilaq isefra ad ten-id-yejmeɛ umdan, yiwen yiwen; ad ten-id-isbin belli n umedyaz Saɛid Ucemmut, ad ten-yaru, ad ten-isismel, ad ten-yesleḍ. S yin akkin : kker-as i udlis, seggem-it, af-d amazrag. Akka, tadla tadla alama yekfa tmegra. Yerna tamegra s tmussni… s teqbaylit. Mačči d ayen isehlen. D tudet. Maca, win iteddun ɣef tidet issawaḍ.
Amezruy n tsekla-nneɣ, yeqqen ɣer yidlisen am wigi. Wa ɣef umedyaz, wa ɣef umengal, wa ɣef unallas, wa ɣef umsezgun. Cwiṭ cwiṭ : ad nesbedd amezruy n tsekla-nneɣ. Ad nesbedd taqbaylit-nneɣ… Ayen nniḍen, yal d ṛṛay-is.
Muḥend Akli Salḥi
