SI LPARI AR BṚAZILYA; AJILI AWṚAƔ, UL AZZGGAƔ I TEGRAWLA TAGREƔLANT TAMƔIDT

Deg ussan-a ineggura ilul-d yiwen umussu aɣeṛfan di Fṛansa, win i semman Ijiliyen Iwṛaɣen. Aya meṛṛa yusa-d imi imḍebṛen n tmurt d wid id yessufɣen taẓeṭṭaṭ ɣaf lkaṛbiṛu. Tamurt n Fṛansa, deg ugafa ar unẓul tenhewwal ; aqfal n yibardan, tikliwin d tmesbaniyin am tida n Lpari id yeglan s umennuɣ ameqqṛan gar imesbaniyen d iɛeggalen n teɣlist yesqedcen takṛit d udebbuz mgal imesbaniyen.

Di tazwara aṭas id-t-yugaden,ama si tama n yikabaren n tsartit neɣ s tin n yinmaluten (sandikat). Aṭas i yenwan tama tayeffust iḥeḍmen neɣ yeddan deg urar n tɣamsa yessuzlen awal d akken d amussu n yifaciyen neɣ n tama tayeffust iḥeḍmen id yellan deffir-s. Maca ɣas llan kra n wiyi deg-s , neɣ wid yebɣan ad-t-seddun deg ubrid-a, maca tuget tefɣ-d mgal tasartit tasihrant n uselway n Fransa. Agdud d win taṛẓa yal tameddurt n yal ass; ccumaj, rennu di tebzart, d summa n selɛa yettalin yal ass, si tama niḍen aɣrud n uxeddam yeqqim d win kan yugi ad yali.

Akken seqqaren : tewweḍ tfidi s iɣes. Ajili awraɣ d talaba iɣummen tafekka deg ttazzalen idammen izeggaɣen n tegrawla tamɣidt. D taḍat n wid yarza lḥif d wid yebɣan ad teɣli tsihrant. D acu kan, ilaq aqaruy n tmacit ad yawin iwaguten niḍen deg ubrid n tegrawla n tidet. Ilaq irgazen d tlawin ad ilin ar tama n yemɣiden-a id yekren , maca ur ttilin ara d ccifan fell-asen. Ilaq ad ilin wid ad iwexxren amussu-a ɣef yemcumen n tama tayeffust iḥeḍmen.

Amaḍal ass-a ilaq-as ijiliyen iwṛaɣen di yal tiɣmart. Ass-a tampirayalit d tasihrant sufɣent-d acciwen-nsent. Ass-a, iɣeblan d wid yugten: Llaẓ, iminigen, ṭṭradat, tawennaṭ tarnuḍ akkin. Imdanen di yal tamurt , ilaq ad ilin d ijiliyen iwṛaɣen, tagrawla ilaqd tagreɣlant. Tasihrant teẓẓa azeṭṭas di yal amḍiq, temɣi deg yimdanen, wid yuɣalen d aklan-is. Di Lpari, di Bṛazilya, Bamaku, Ṭukyu neɣ di Dimacq d tameddurt n yiḍ ur nesɛi itran d tziri ur d-yefrari yiṭij n wass. Iṭij n wass s tdukli n yemɣiden ; irgazen , tilawin, ibarkenen neɣ icebḥanen. Ad nili akk am ijiliyen iwṛaɣen, aneddu akk deg ubrid anemlay agrawlan arnu ad necnu akk tagrawla tamɣidt tagreɣlant. Akken i d-as-yenna Karl MARKS:  » Imɣiden n yakk timura, ddukklet! ».

AMAR BENHAMOUCHE