D 11 n yiḍ. Ccix n lǧameɛ yesla i tyitiwin di tewwurt n uxxam-is, iruḥ yeldi. Yaf-it d Muḥend Aberkan, lǧar-is asekran.
— Salamu ɛalikum ! D acu k-id-yecqan akka di lawan-a, a Muḥend Aberkan ? Ha-tt-an d leḥdac n yiḍ tura, seg yiḍes i yi-d-tsekreḍ.
— Ibba d kečč i yi-d-yecqan, a ccix, ssalam u raḥmatuhu ! Tixer-ik akin ɣef tewwurt, eǧǧ-iyi ad d-kecmeɣ, ɣur-i lhedra yid-k.
— Kcem, kcem. A-t-an uxxam-iw d axxam-ik. Ɛeddi ɣer din ar uṣalu ad teqqimeḍ, tura ad ak-d-awiɣ lqahwa ad d-uɣaleɣ.
— Nu nu nu nu… ! Ala, ur ḥwajeɣ ara lqahwa-k ɣef 11 n yiḍ, rwaḥ uɣal-d ɣer da, d kečč ay ḥwajeɣ. Ha-t-an, ha ! Qqim akken tura dinna taneqbala-w, tiniḍ-iyi-d ! Acuɣer akka ur teddineḍ ara ɣef lɛica iḍ-agi ?
— Nniɣ-ak a gma d taqsiḍt meqqren. Aql-aɣ « en grève » nekkni s lecyax n leǧwameɛ, ɣef waya ur ddineɣ ara akk ass-a, la lefjer, la ṭṭhur, la lɛaṣer, la lmeɣreb, wala lɛica… Ah, ah ah… Atan la d-teṭṭeɛdiɛeḍ akk s ccrab, teswiḍ aql-ak-id a Muḥend ?
— Ddin uqabac ! Ɛni armi d tura i yi-d-tɛeqleḍ d Muḥend ! A nniɣ-ak swiɣ, ih ! Yerna iḍ-agi dagi ar ɣur-k ara tt-wteɣ arma d ssbeḥ. Tebɣiḍ ṭṭeṣ, tebɣiḍ qqim. Ass-agi tḥebseḍ tuddna, nekk temdel-d fell-i tmeṭṭut tawwurt, ur yi-tettaǧǧa ad kecmeɣ. Ba seg zik mi qqimeɣ di lbar, lawan n lɛica mi d-sliɣ teddneḍ, ad ruḥeɣ s axxam-iw. Tettarraḍ-iyi-d ɣer ubrid, ad k-ifekker Rebbi ɣef cchada. Lameɛna ass-agi aql-ik « en grève », ibba wteɣ-tt armi d-yeɣleq lbar. Tura qabel-itt kečč, ḍebber i uqerry-ik ! Wamma acuɣer ur tetteddneḍ ara yeɛni ?
— Nniɣ-ak neḥbes lxedma nekkni s lecyax-agi n leǧwameɛ, a nettnadi ad aɣ-rnun cwiṭ di ssuma, drus maḍi ay aɣ-ttaken. Tura ma d iḍes i tebɣiḍ ad teṭṭseḍ ɣur-i, mreḥba yis-k, ma d tuddna ur tteddneɣ ara, dayen. Yerna acḥal d abrid i ak-nniɣ tixer-ik i tissit ! Wamma ayɣer ara k-teǧǧ tmeṭṭut-ik di berra lemmer ur teswiḍ ara yerna teqqimeḍ ar lweqt-a ?
— Tixer-iyi a ccix, ḥebber i lhemm-ik, eǧǧ win-iw azekka ad yefru. Ba tura kečč teqqareḍ-iyi tixer i tissit, nekk qqareɣ-ak tixer i tẓallit d tuddna. Lukan tuɣeḍ awal-iw, truḥeḍ tnudaḍ axeddim, mačči akken axir-ak, wala ad tettrajuḍ ddewla melmi ara ak-tefk sin frakat ɣef tuddna-k !
— Ccɣel-agi meqqer a Muḥend ! Amek ara ǧǧeɣ abrid n Rebbi, ad tebɛeɣ abrid n cciṭan, ad t-yexzu Rebbi inɛel-it ! Rnu-yas nekk ur ssineɣ i kra, ma mačči d tuddna neɣ d taẓẓallit, ur zmireɣ ad xedmeɣ acemma. Acu ara xedmeɣ ?
— Ba tura dagi, ma tebɣiḍ ad ḍebbreɣ fell-ak, a ccix, ḥess-iyi-d kan ! Keččini taɣect-ik ma ca’a allah, tecbeḥ yerna tesɛa sser, teǧhed daɣen. Alukan ad iyi-taɣeḍ awal, ssneɣ yiwen d amdakel, ɣur-s astudyu, ad k-awiɣ ɣur-s ad txedmeḍ. Ad ak-d-nwali walbeɛḍ n yimedyazen ad ak-d-yexdem isefra n lɛali, albeɛḍ n yimuzisyanen ad asen-isili lmuziga, ad d-yeqqim fell-ak ala ccna. A besmelleh u yalleh ! Tafsut ha-tt-an qrib ad d-taweḍ, ad d-tebɛezqeḍ s walbeɛḍ n tuɣac ɣef Tefsut Imaziɣen, kra n tezlatin n tayri i « les ados » ad txedmeḍ « succès ». Anebdu daɣen, kra n tezlatin n lfuruḥ, dɣa ad tawḍeḍ taqacuct, idrimen ad tɛumeḍ deg-sen…
— A bbwa bbwa bbw… ! Ayen akk i yi-tmennaḍ a Muḥend ! Nniɣ-ak izad-ak ssikran ass-a. Qqim kan tura ṭrankil mulac ad d-tsakiḍ arraw-iw, ha-ten-ah ṭṭsen. Yeqqim-d umɛic iḍmen-it sidi Rebbi lɛalamin.
— Ala, ala, ala, a ccix ! Nekk « sérieusement » i ak-d-heddreɣ ! « tu vois » ! Ibba, smana-yagi ad ak-tt-fruɣ, « tu vois » ! Muḥemmed Lamin akka am kečč i yella zik, wali kan tura anda yuweḍ ! Alukan mačči d ccna, ad t-tsiweḍ tuddna-s akka yuweḍ ass-a ? Xzu cciṭan a ccix, aɣ-iyi awal, ad ak-aɣeɣ awal ula d nekk. Azekka ad ḥebseɣ tissit, kečč bdu ccna…
Sɣur Hocine Louni
