Tella yiwet n teqcict tetteddu deg ubrid yettawin s axxam-is, abrid d ilem, ulac win ara d-temmagreḍ din.
Cwiṭ kan iban-d yiwen n yilemẓi, yezzuɣur tacariṭ-is iɣef d-iɛebba isenduqen, mi tqerreb ɣur-s yeṛwa tamuɣli deg-s, ur yeẓri ara anda i yeggar iḍarren-is, din din yenneqraɛ, tegrureb-as tcariṭ-nni ddaw ubrid, allen ntant deg thuski n tlemẓit-nni. Yekker ijemmeɛ-d tiɣawsiwin-is i d-yeɣlin seg yisenduqen-nni mi d-ldin.
Tilemẓit tuẓa ɣur-s. Tenna-yas : “ Suref-iyi! D nekk i d ssebba n waya”.
Yenna-yas : “ Mačči d kemm i igan anect-a, d nekk kan i d ssebba”.
Tenna-yas : Ihi, deg sin i d-nuǧew anect-a. Tebda tjemmeɛ yid-s ayen akk i d-yemmaren din.
Yenna-yas : “ Tanemmirt ɣef tallelt”. Ikemmel abrid-is …
Netta iteddu, nettat ur tessebɛed ara fell-as, kra n yisurifen kan gar-asen, ilemẓi iḥekker tamuɣli deg thuski i tesɛa, allen-is bɣant ad d-inint kra… Teḍsa-yas-d … tenna-yas : “ Ɣur-k abrid! Atan ad tɛiwdiḍ agrireb daɣen… yenneqneq s teḍsa… Yenna-yas : “ Ur zmireɣ ara ad sebreɣ i thuski i ẓerrent wallen-iw, bɣiɣ ad kem-ṛwuɣ … Teḍṣa-d, tenna-yas : “ Abrid-iw ad yekfu deg kra kan n yisurifen, nekk daɣen ur d-yeqqim ara aṭas…”.
– S anda i tettedduḍ akka!
– Ad awḍeɣ ɣer bab n tḥanut-nni i yeznuzun tizegzawin.
Tewhem !!!
– Tessneḍ d anwa-t urgaz-nni.
– Ur t-ssineɣ ara, maca nekk ttawiɣ-as kan tiɣawsin-is ɣer tḥanut.
Teḍsa-d… Winna d baba …
– Ihi, ad neddakkel s axxam-nwen.
Mi wwḍen ɣer tḥanut, afen bab-is urɛad d-yuɣal seg ssuq, yella wayen ara d-yeqḍu syin…Yenna-yas : “ Anef ihi ad nesres isenduqen-a daxel uxxam”. Dɣa akken i xedmen, almi d-yewweḍ bab n cci, yeddem, yefka-yas i yilemẓi-nni kra n yidrimen, d azref-is. Yebren tikli-s …
Deg ubrid n tuɣalin, yefreḥ nezzeh, icennu, iceṭṭeḥ i taɣect-is ula d abdrid iceṭṭeḥ yid-s… Yettmekti-d tamuɣli n tlemẓit-nni i ikecmen ɣer tefkert n wul-is.
Azekka-nni, yeṭṭef abrid-is ɣer ssuq-nni, ahat ad yaf din bab n ṭhanut-nni akken ad as-yessiweḍ daɣen ayen i d-yeqḍa, yebɣa ad iwali tilemẓit-nni i as-yerwin allaɣ-is s tmuɣli. Yegguni aṭas, ur d-yusi urgaz-nni.
Yuɣal s axxam, tasa-s turew-d asemmiḍ … Yemmekta-d abrid i yettawin ɣer uxxam-is, yekka syin, mi i izeggen abrid yenna : “ Ad ruḥeɣ kan ɣer tḥanut-nni, ad d-aɣeɣ kra, ahat ad tt-id-waliɣ”.
Mi yewweḍ ɣer din, yemmuqel-it-id urgaz-nni yenna-yas : “ Ansuf yes-k a mmi, fell-ak i ttnadiɣ.
Aqcic yergagi, yewhem, d acu a Dda…
Yenna-yas : “Bɣiɣ ad tiliḍ d axeddam deg tḥanut-a… Nekk tura meqqreɣ, ur zmireɣ ara ad beddeɣ aṭas da.
Yenna-yas : “ Ihi, a dadda, qebleɣ.
Aqcic, yeqbel din din, war ma yecreḍ kra fell-as.
Mi d-yewweḍ lawan n yimekli, atta tlemẓit-nni tejba-d, tewwi-yasen-d ad ččen, teqqim ɣer baba-s d yilemẓi-nni. Yessawel-d urgaz-nni yenna : “ Ḥemmleɣ-k aṭas ay aqcic uḥric, fell-ak kan i ttekleɣ. Acḥal aya tura kečč d asiweḍ n yisenduqen ɣer tḥanut-iw war ma ddiɣ-d yid-k, ula d yiwen n wass ur ak-d-sukkseɣ kra, nekk seg tama-w bɣiɣ ad ak-buddeɣ ayen i d-yeqqimen deg tudert-iw.
Aqcic, iɣil d kra n tɣawsa ara as-d-yefk neɣ d ayen-nniḍen seg tgemmi-s.
Yenna-yas yilemẓi-nni : “ D acu i tebɣiḍ ad d-tiniḍ s waya a dadda?.
– Bɣiɣ ad ak-fkeɣ Tafat, yelli-nni i tḥemmleḍ akken, ula d nettat tḥemmel-ik.
– Maca, a dadda ur sɛiɣ ara akk kra yeɣlayen akken ad zewǧeɣ d yelli-k.
– A mmi, kečč d Tafat ad teqqimem deg uxxam-a, d ayla-nwen, iman-nwen.
Ilemẓi, iẓri-s yeɣleb leḥmali seg tumert i yumer…
Zrin kan kraḍ n wussan, yezweǧ d Tafat, yezdeɣ din kan deg uxxam-nni, yeǧǧa tacariṭ-nni. Yedder tudert n liser yid-s.
© Malek Ɛelwi
01/01/2019
